‘E zampugnare
sempe cchiù raramente
se vedono p’‘e vvie
addò ‘a folla pe’ correre
nun tene manco ‘o tiempo
‘e risciatà.
Pe’ ll’aria, ‘nzieme a nu prufumo ‘e pigne,
se spanneno ‘e nnote, letania ‘e dicembre
‘e na nuvena scurdata…
Quanta suspire vedenno
na sporta ‘e legnasante…
Fore a na chiesia
miez’‘o tanfo d’‘a gente,
esce ‘o coro ‘e n’ave mmaria
mentre na mana se stenne…
Natale nun è pe’ tutte quante
na festa, nu mutivo d’alleria,
è quase sempe na malincunia
pe’ chi tene ‘int’‘o core na poesia.
Addò sta cchiù chella canzone antica
ca parlava d’ammore ‘e nu cafone
pe’ na signora, ch’era tutta napule,
chien’‘e ricchezza, tutta nu splennore.
E mo sti pasturielle,
luntane d’‘a famiglia pe’ nu mese
accummneciano quanno è ‘a mmaculata
cercanno ‘a carità pe’ na sunata.
Dint’‘e vascie
addò na vota steveno ‘e madonne,
o na figura ‘e sante, o giesù cristo
truneggia grossa ‘na televisione.
Ma che scennite a fà ‘a sti muntagne
d’‘o mulise, matese, d’avellino,
nun v’accurgite c’ogge n’automobbile
nun v’accumpagna comme a nu traino…
Chiagneve ajere nu ciaramellaro,
core ‘e pute, nu travaso ‘e bbene
mentre sunava, comm’a ffunerale,
‘e nnote triste ‘e ll’urdema nuvena…
Luciano Somma
